लाजून हासणे अन्
लाजून हासणे अन् हासून हे पहाणे
मी ओळखून आहे सारे तुझे बहाणे
डोळ्यांस पापण्यांचा का सांग भार व्हावा ?
मिटताच पापण्या अन् का चंद्रही दिसावा ?
हे प्रश्न जीवघेणे हरती जिथे शहाणे
हाती धनुष्य ज्याच्या त्याला कसे कळावे ?
हृदयात बाण ज्याच्या त्यालाच दुःख ठावे !
तिरपा कटाक्ष भोळा, आम्ही इथे दिवाणे
जाता समोरुनी तू उगवे टपोर तारा
देशातुनी फुलांच्या आणी सुगंध वारा
रात्रीस चांदण्याचे सुचते सुरेल गाणे
-मंगेश पाडगांवकर
कोणत्याही टिप्पण्या नाहीत:
टिप्पणी पोस्ट करा